Shivchhatrapati Khand Pahila By Chandan Pawar (शिवछत्रपती खंड पहिला)

खरं तर छत्रपती शिवाजी महाराजांबद्दल कितीही लिहले तर ते थोडकेच! शिवकार्याची लांबी-रुंदी कोणीही मोजू शकत नाही.

शिवचरित्र म्हणजे अमृतच! ते कोणत्याही भांड्यातून प्या त्या अमृताची गोडी बदलत नाही. आज व्हाटस्अपच्या काळात नको तितके समूह आणि नको ते संदेश वाचता पाहता वीट येऊन जातो. अशावेळी बहुतेक लोक संसाधनांना नावे ठेवतात. पण वापरकर्ते काही सुधारत नाहीत. या संसाधनाचा योग्य वापर करून शिवआचार-विचारांचा प्रचार व प्रसार केल्यास प्रत्येकाच्या जीवनात आमूलाग्र बदल होतील असे मला वाटते.

सध्याचा काळ हा घडण्यापेक्षा बिघडण्याचा जास्त वाटतोय. ज्यांनी समाज घडवायचा तेच हातातील साधनाने आग लावत सुटले आहेत.अशा काळात सर्वाना एकत्र बांधून ठेवणारा धागा म्हणजे शिवचरित्र! आबालवृद्धांना आवडेल अशा सहज-सोप्या शैलीतले हे शिवचरित्र वाचनीय पेक्षा अनुकरणीय आहे. बदलत्या काळात शिवचरित्र डोक्यात घेण्याची गरज आहे. आचरणकर्ते शिवभक्त वाचनातून निर्माण होतील असा मनोदय व्यक्त करतो.

शिवइतिहासाची सद्यस्थितीशी सांगड घालून आज आपले राष्ट्र बलवान करण्यासाठी कोणकोणत्या उपक्रम व कृतींची आवश्यकता आहे हे हक्काने व हट्टाने प्रस्तुत कादंबरीतून प्रतिपादन केले आहे. कारण आवाहन व आव्हान केल्याशिवाय आम्ही जागे होत नाहीत ही आमची शोकांतिका आहे. शिव आचार-विचारांचा जागरकार्याच्या या चळवळीत मला खारीचा वाटा उचलता आला हे माझे भाग्यच म्हणावे लागेल.